A.{DVNSNŞT.d. 44 #01

sa. 41, sa 42 (2x), sa 43

A. DVNSNST.d, 44-7

sh: 12

232
Müstahfızlık-ı kal‘a-i Antalya
Teke Sancağı'nda Karahisar Nâhiyesi'nde Kumbak nâm karye ve gayrıdın bin altı yüz akçe gedik timar ile kal‘a-i merkūme müstahfızlarından Mehmed veled-i Halil'in târih-i merkūme ve berât-ı şerîfle üzerinde iken yedinde olan berâtı zâyi‘ olmağla gedik timar-ı mezbûr berâtı zâyi‘inden merkūma ibkāsı bâbında dizdârı Mehmed Ali zîde hıfzuhû arz etmeğin mûcebince ibkā olunup tahvîl verilmişdir.
Fî 19 S. sene [1]240.

233
Müstahfızlık-ı kal‘a-i Antalya
Teke Sancağı'nde Elmalu Nâhiyesi'nde Semaöyüğü nâm karye ve gayrıdan bin dört yüz akçe gedik timar ile Antalya Kal‘ası müstahfızlığı dârende Seyyid Ahmed veled-i Mehmed'in bin iki yüz otuz üç târihi ve berât-ı şerîfimle üzerinde iken yedinde olan berâtı bi-kazâ’i'llâhi te‘âlâ zâyi‘ olmağla gedik timar-ı mezbûr berâtı zâyi‘inden merkūma ibkā olunmak bâbında kal‘a-i merkūme dizdârı Mehmed Ali zîde hıfzuhû arz etmeğin mûcebince ibkā olunup tahvîl verilmişdir.
Fî 19 S. sene [1]240.
Muhlis

232
Müstahfızlık-ı kal‘a-i Antalya
Teke Sancağı'nda İstanos Nâhiyesi['nde] Bayad nâm karye ve gayrıdan bin dört yüz akçe gedik timar ile Antalya Kal‘ası müstahfızlığı dârende es-Seyyid Müstaha veled-i Mehmed'in iki yüz yirmi iki târihi ve berât-ı şerîfimle üzerinde iken yedinde olan berâtı bi-kazâ’i'llâhi te‘âlâ zâyi‘ olmuş olduğundan gedik timar-ı mezbûrun berâtı zâyi‘inden merkūma ibkāsı bâbında kal‘a-i merkūme dizdârı Mehmed Ali zîde hıfzuhû arz etmeğin mûcebince ibkā olunup tahvîl verilmişdir.
Fî 19 S. sene [1]240.

230
Müstahfızlık-ı kal‘a-i Antalya
Teke Sancağı'nda İstanos Nâhiyesi'nde Hacı nâm karye ve gayrıdan bin yedi yüz akçe gedik timara mutasarrıf Antalya Kal‘ası müstahfızlarından Seyyid Sadullah veled-i Seyyid Osman terk-i kal‘a ve târik-i hidmet olup gedik timar ile kal‘a-i merkūme mustahfızlığı mahlûl olmağla mahlûl-i mezbûr erbâb-ı istihkākdan dârende Ahmed veled-i Müstaha'ya kal‘a-i merkūme dizdârı Mehmed Ali zîde hıfzuhûnun arzı mûcebince tevcîh olunup tahvîl verilmişdir.
Fî 29 S. sene [1]240.
A. DVNSNST.d, 44-42

sh: 77

232
Kethüdâlık-ı topî-i kal‘a-i Antalya
Teke Sancağı'nda Karahisar Nâhiyesi'nde Sürek nâm karye ve gayrıdan bin sekiz yüz akçe gedik timar ile kal‘a-i merkūmenin topcu kethüdâlığına mutasarrıf İsmail veled-i Hasan'ın bilâ-veled fevtinden erbâb-ı istihkākdan dârende İbrahim veled-i Ali'ye dizdârı Mehmed Ali zîde hıfzuhû arzıyla tevcîh olunup tahvîl verilmişdir.
Fî 24 L. sene [1]245.

232
Müstahfızlık-ı kal‘a-i Antalya
Teke Sancağı'nda Karahisar Nâhiyesi'nde Bakırcıkaya nâm karye ve gayrıdan bin dört yüz akçe gedik timara mutasarrıf kal‘a-i merkūme müstahfızlarından Mehmed veled-i Ömer'in fevtinden erbâb-ı istihkākdan sulbî oğlu dârende Ömer Ali'ye dizdârı Mehmed Ali arzıyla tevcîh olunup tahvîl verilmişdir.
Fî 24. L. sene [1]245

232
Müstahfızlık-ı kal‘a-i Antalya
Teke Sancağı'nda Kürt Nâhiyesi'nde Denizpınarı nâm karye ve gayrıdan bin dört yüz yirmi üç akçe gedik timara mutasarrıf kal‘a-i merkūme müstahfızlarından Abdullah veled-i Halil'in fevtinden erbâb-ı istihkākdan sulbî kebîr oğlu dârende Ebubekir'e dizdârı Mehmed Ali zîde hıfzuhû arz etmeğin mûcebince tevcîh olunup tahvîl verilmişdir.
Fî 24 L. sene [1]245.

234
Müstahfızlık-ı kal‘a-i Antalya
Teke Sancağı'nda Elmalu Nâhiyesi'nde Kızılsaray nâm karye ve gayrıdan bin beş yüz akçe gedik timara mutasarrıf kal‘a-i merkūme müstahfızlarından Mehmed veled-i Mustafa'nın bilâ-veled fevtinden erbâb-ı istihkākdan dârende Salih veled-i Hüseyin'e dizdârı Mehmed Ali zîde hıfzuhû arz etmeğin mûcebince tevcîh olunup tahvîl verilmişdir.
Fî 24 L. sene [1]245.

236
Müstahfızlık-ı kal‘a-i Antalya
Teke Sancağı'nda İstanos Nâhiyesi'nde mezra‘a-i Köyobası ve gayrıdan bin dört yüz elli altı akçe gedik timara mutasarrıf kal‘a-i merkūme müstahfızlarından es-Seyyid Süleyman'ın fevtinden sulbî oğlu erbâb-ı istihkākdan dârende Mahmud'a dizdârı Mehmed Ali arzıyla tevcîh olunup tahvîl verilmişdir.
Fî 24 L. sene [1]245.
Râşid

229
Dizdârlık-ı kal‘a-i Antalya
Teke Sancağı'nda Elmalu Nâhiyesi'nde Gilevgi nâm karye ve gayrıdan sekiz bin üç yüz akçe gedik timar ile kal‘a-i merkūme dizdârlığına mutasarrıf Ali serdârân-ı zülüfliyân-ı hâssa fevt olup gedik timar-ı mezbûr ile dizdârlığı mahlûl olduğunu seferliden muhrec dârende İbrahim Edhem zîde hıfzuhû rikâb-ı kamer-tâb-ı hüsrevâneye bâ-arzuhâl inhâ ve istid‘â ol bâbda şeref-yâfte-i sudûr olan emr-i hümâyûn-ı şâhânem mûcebince mezkûrun fevtinden mûmâ-ileyhe tevcîh olunup tahvîl verilmişdir.
Fî 8 Za. sene [1]245.
A. DVNSNST.d, 44-44

sh: 81

240
Müstahfızlık-ı kal‘a-i Antalya
Teke Sancağı'nda İğdir Nâhiyesi'nde Çiftlik ez-cemâ‘at-i Geriş ve gayrıdan bin dört yüz yirmi bir akçe gedik timara mutasarrıf kal‘a-i merkūme müstahfızlarından dârende Ahmed veled-i Osman'ın iki yüz kırk târihi ve berât-ı şerîfimle üzerinde iken yedinde olan berâtı bi-kazâ’i'llâhi te‘âlâ zâyi‘ olmuş olmağla zâyi‘inden merkūma ibkāsı bâbında kal‘a-i merkūme dizdârı el-Hâc İbrahim Edhem zîde hıfzuhûnun arzı mûcebince ibkā olunup tahvîl verilmişdir.
Fî 9 R. sene [1]246.

238
Müstahfızlık-ı kal‘a-i Antalya
Teke Sancağı'nda İstanos Nâhiyesi'nde Sülüklü nâm karye ve gayrıdan bin beş yüz on altı akçe timar ile kal‘a-i merkūme müstahfızlığı dârende Seyyid Mustafa veled-i Osman'ın berât-ı şerîfle üzerinde iken yedinde olan berâtı zâyi‘ olmuş olmağla gedik timar-ı mezbûr berâtı zâyi‘inden merkūma müceddeden ibkāsı bâbında kal‘a-i merkūme dizdârı el-Hâc İbrahim Edhem zîde hıfzuhû arz etmeğin mûcebince ibkā ve tahvîl i‘tâ olunmuşdur.
Fî 9 Ra. sene [1]246.

sh: 82

238
Müstahfızlık-ı kal‘a-i Antalya
Teke Sancağı'nda Elmalu Nâhiyesi'nde Çukurkoğa nâm karye ve gayrıdan bin altı yüz akçe gedik timara mutasarrıf kal‘a-i merkūme müstahfızlarından Osman veled-i Mustafa terk-i kal‘a ve târik-i hidmet olup gedik timar-ı mezbûr ol vechile mahlûlünden erbâb-ı istihkākdan dârende Seyyid Hüseyin veled-i Seyyid Mehmed'e Dizdâr el-Hâc İbrahim Edhem zîde hıfzuhû arz etmiğin mûcebince tevcîh olunup tahvîl verilmişdir.
Fî 19 Ra. sene [1]246.