HAT. 1224/47833 C #2

HAT, 1224-47833-C-2

Sa‘âdetlü meveddetlü mekremetlü karındaş-ı vâlâ-kadrim sultânım aga-yı celîlü'ş-şân hazretleri
Dâimâ karîn-i tevfîk-i Bârî ve rehîn-i vikāye-i hazret-i perverdigârî olmaları da‘avâtı tekrârı ile nümâyende-i hulûskârî olur ki pederim merhûm öleli beş ay oldu. Devlet-i Aliyye bizden yedi hazîne matlûb ediyor. Biz de bir hazîne verecek olduk. Devlet-i Aliyye râzı olmadı. Kerem ve inâyet buyurup bu husûsu devletlü sadr-ı a‘zam efendimiz hazretlerine arz ve niyâz edip râbıta ve tenzimine sa‘y ve himmet buyurmanız niyâzı ve hâssaten suâl-i hâtır-ı sa‘âdet zımnında işbu kāim-i meveddet tahrîrine ibtidâr ve firistâde-i nezd-i semâhat-karârları kılındı. İnşâallâhu te‘âlâ lede-şerefi'l-vüsûl keyfiyet ber-vech-i muharrer karîn-i ilm-i âlem-perverleri buyuruldukda bizim umûr ve husûsumuz sizlere râci‘dir. Kerem ve inâyet buyurup husûs-ı mezbûrun râbıta ve tanzîmine sa‘y ve himmet buyurmanız niyâz-ı hâlisânemizdir ve kaldı ki bu husûs râbıta ve nizâm buldukda sâir hediyemizden başka size elli bin guruş verileceği muhakkakdır ve bu husûs için tarafımızdan Bölükbaşı Monla [Molla] Ağa mahsûsan tarafınıza irsâl olunmuşdur vardığında her husûs etrâfıyla mezbûr Monla [Molla] Ağa'nın takrîrinden ma‘lûm-ı sa‘âdet buyuruldukda husûs-ı mezbûrun râbıta ve tanzîmine sa‘y ve himmet ve merâsim-i hukūku ve dostluğu icrâya gayret buyurmanız müstercâ-i hâlisânemdir.
Fî 18 Ş. sene [1]227.

İbrahim
Mütesellim-i Teke hâlâ
(mühür)