HAT. 1350/52744 #1

HAT, 1350-52744-1

Benim vezîrim
İşbu takrîrin ve evrâk-ı sâire manzûrum olmuşdur. Bu herifi kayd [ü] bend ile kapudan paşaya irsâl eyleyesin ve evrâkı dahi beraber gönderesin müşârun-ileyh ne vechile münâsib ise öyle eylesin ve iktizâ eder ise bu gelen herife tertîb-i cezâ eylesin bunu tutup getiren çavuşa üç bin guruş atiyye ve hil‘at verilsin doğrusu sadâkat etmiş ber-hurdâr olsun.

Şevketlü kerâmetlü mehâbetlü kudretlü velî-ni‘metim efendim pâdişâhım
Antalya'da mütehassın Tekelioğlu İbrahim nâm şakī mu‘teber âdemlerinden Damgacı Mehmed nâm kimesne ile isti‘fâyı hâvî hafiyyeten Dersaadet'e bir takım tahrîrât irsâl etmiş olduğu kapudan paşa kullarının ma‘lûmu olarak tecessüsü zımnında mahsûsan donanma-yı hümâyûn çavuşlarından bir iki nefer kimesne ta‘yîn ve etrâfa me’mûr çavuşlara dahi tahrîrât itâresiyle merkūmun elegetirilmesi tenbîh ve telkīn olunmuş olduğundan merkūmun Deraliyye'ye azîmet için Kemer Limanı'na vürûdunda müşârun-ileyh kulları tarafından Şehirköyü'ne asker husûsu için me’mûr olan Cezayirli Ahmed Çavuş bi't-tesâdüf merkūmu der-akab girift ve yedinde olan tahrîrâtı ahz ile Dersaadet'e getirmiş olmağla tahrîrât-ı mezkûre ve merkūm Mehmed'in kaleme aldırılan iki kıt‘a takrîri manzûr-ı me‘âlî-mevfûr-ı şâhâneleri buyurulmak için takdîm-i atebe-i ulyâ-yı mülûkâneleri kılındı merkūm Mehmed Bâb-ı Âlî'de tomrukda habs etdirilmiş olup ancak işbu tahrîrâtın Deraliyye'ye vürûdundan müşârun-ileyh vesveseye zâhib olarak umûruna fütûr vermemek ve takviye-i nüfûzuna medâr olmak için zikr olunan tahrîrât meşhûd-i lihâza-i kerâmet-ifâza-i cihân-bânîleri buyuruldukdan sonra savb-ı çâkerîden mahsûsan mektûb tahrîriyle mahbûs-ı merkūm ile ma‘an müşârun-ileyh kullarına gönderilmek husûsu hâtır-güzâr olduğu muhât-ı ilm-i âlîleri buyuruldukda bu sûret nezd-i mekârim-vefd-i şâhânelerinde dahi karîn-i istisvâb olur ise emr u fermân şevketlü kerâmetlü mehâbetlü kudretlü velî-ni‘metim efendim pâdişâhım hazretlerinindir.