AE. SMHD. I. 102/7210 #1A

A. E. I. MAHMUD, 7210

[TUĞRA]
[I. MAHMUD]

Nişân-ı şerîf-i âlîşân-ı sâmî-mekân-ı sultânî ve tuğrâ-yı garrâ-yı cihân-sitân-i hakanî hükmü oldur ki
Kıdvetü's-sikāt ve'l-müstahfızîn Antalya Kal‘ası Dizdârı Mehmed zîde hıfzuhû südde-i sa‘âdetime mektûb gönderip Teke Sancağı'nda Karahisar Nâhiyesi'nde Sürek nâm karye ve gayrıdan bin sekiz yüz akçe gedik timar ile Antalya Kal‘ası'nın topcular kethüdâsı olan Hacı Ahmed veled-i Mehmed fevt olup gedik timar ile kal‘a-i mezbûre topcular kethüdâlığı mahlûl olmağla sulbî oğlu râfi‘-i tevkī‘-i refî‘u'ş-şân-ı hakanî Mehmed'e verilmek bâbında inâyet ricâsına arz etmeğin hidmet-i lâzımesin edâ etmek şartıyla tevcîh olunmak için sene tis‘a ve hamsîn ve mi’ete ve elf Muharremi'nin on ikinci günü târihiyle hükm-i şerîfim verildikden sonra tezkiresi ihrâc olunmağla zikr olunan bin sekiz yüz akçe gedik timar ile kal‘a-i merkūme topcular kethüdâlığı vech-i meşrûh üzere merkūm Mehmed veled-i el-Hâc Ahmed'e tevcîh olunup südde-i sa‘âdetimden lâyık ve evlâ ve sezâvâr ve ahrâ görüp verdim ki zikr olunur

Karye-i Sürek tâbi‘-i Karahisar
Akçe
8800
1800

Ve buyurdum ki ba‘de'l-yevm taht-ı yedinde olup tasarruf kılıp şol ki vezâ’if-i hidemât-ı kal‘a-i mezbûre topcuları kethüdâlığıdır bî-kusûr mer‘î ve mü’eddî kıla ol bâbda efrâd-ı âferîdeden hiç ehad mâni‘ ve müzâhim olmayıp dahl ü ta‘arruz kılmaya şöyle bileler alâmet-i şerîfe i‘timâd kılalar.

Kostantıniyyetü'l-Mahrûse