AE. SABH. I. 176/11735 #1

A. E. I. ABDÜLHAMİD, 11735

Dergâh-ı felek-medâr ve bârgah-ı gerdûn-iktidâr türâbına arz-ı bende-i bî-mikdâr budur ki
Teke Sancağı'nda İstanos Nâhiyesi'nde Maan nâm karye ve gayrıdan bin dört yüz akçe gedik timar ile Antalya Kal‘ası müstahfızlarından Ahmed veled-i Osman bi-emri'llâhi te‘âlâ fevt olup ol vechile gediği hâlî ve hidmet-i lâzımesi mu‘attal kalmağla bâ‘is-i arz-ı ubûdiyyet sulbî oğlu Mehmed her vechile lâyık ve mahal [ve] müstahık ve hidmet-i lâzımesinin uhdesinden gelmeğe kādir kulları olmağla müceddeden yedine berât-ı şerîf-i âlîşân sadaka ve ihsân buyurulmak ricâsıyla pâye-i serîr-i a‘lâya arz u i‘lâm olundu. Ol bâbda emr [u] fermân lütf u ihsân hazret-i men lehü'l-emrindir.

Bende-i
Mehmed Yunus dizdâr-ı kal‘a-i Antalya hâlâ

Defterhânesi

Nâhiye-i İstanos der-livâ-i Teke
Timar-ı Ahmed veled-i Osman an-merdân-ı kal‘a-i Antalya an-tahvîl-i hod
Karye-i Maan tâbi‘-i m.
1400 akçe
Fî 12 S. sene [1]189.
Babası fevtinden yüz kırk bir Cemâziyelûlâsı'nda mezkûr Ahmed'e tevcîh olunup cülûs-ı hümâyûnlar vukū‘uyla târih-i mezkuda berât eylemişdir.

Tahvîli inhâsı

İşbu dizdârı arz ve inhâsıyla tevcîh olunagelmişdir. Fermân devletlü sultânım hazretlerinindir.

Sahîhdir

Gedik timar-ı mezkûr derkenârda mastûr Ahmed veled-i Osman'ın berâtla üzerinde olup âhere verildiği kaydı bulunmamışdır. Fermân devletlü sultânım hazretlerinindir.

Derkenâr şüd
Fî 27 Ca. sene [1]202
Vehbi

Mûcebince tevcîh olunmak buyuruldu.
Fî 29 Ca. sene [1]202.