HAT. 1528-1-1-1 #1

HAT, 1528-1-1-1

İhsân-ı hümâyûnum olmuşdur.

Hak sübhânehû ve te‘âlâ hazretleri
Şevketlü mehâbetlü kerâmetlü pâdişâh-ı âlem-penâh efendimiz hazretlerinin mübârek vücûd-ı hümâyûnların cemî‘-i ekdârdan masûn ve mahfûz eyleyip serîr-i saltanat-ı aliyye-i mülûkânelerinde ber-karâr ve a‘dâsı üzere galib eyleye âmin. Arzuhâl-i kullarıdır ki hâlâ Adalya Kal‘a dizdârlığına mutasarrıf olan dizdârı fevt olmağla müteveffâ-yı mezkûrun mahlûlünden bu kullarına bâ-mukābele-i nân mezkûr dizdârlığı tevcîh ve ihsân-ı hümâyûn buyurulmak bâbında emr [u] fermân şevketlü mehâbetlü kerâmetlü pâdişâh-ı âlem-penâh efendimiz hazretlerinindir.
Bende-i
Ali zülüfliyân-ı teberdârân-ı hâssa

Defterhânesi kaydı şürûtu

Nâhiye-i Elmalu der-livâ-i Teke
Timar-ı Mustafa veled-i el-Hâc Osman dizdâr-ı kal‘a-i Antalya
An-tahvîl-i Mehmed Sadık veled-i Mehmed Yunus kasr-ı yed kerde
Karye-i Gül(Kel)bükü tâbi‘-i m.
8300 akçe
Fî sene [1]214.

Gedik timar-ı mezbûrun hilâf-ı defter-i hakanî âhere tahvîl verildiği kaydı bulunmamışdır. Fermân devletlü sultânımındır.

Derkenâr şüd
Fî 24 N. sene [1]226

Şeref-yâfte-i sudûr olan hatt-ı hümâyûn-ı inâyet-makrûn mûcebince gedik timar ile dizdârlığı fevtinden sâhib-i arzuhâl merkūma bâ-mukābele-i nân tevcîhi nizâm-ı müstahsene şürûtundandır. Fermân devletlü sultânımındır.

Şeref-yâfte-i sudûr olan hatt-ı hümâyûn-ı inâyet-makrûn-ı şâhâne mûcebince şürûtu üzere gedik timar dizdârlığı fevtinden sâhib-i arzuhâl merkūma bâ-mukābele-i nân tevcîh olunmak buyuruldu.
24 N. sene [1]229.