HAT. 1224/47833 B #1

HAT, 1224-47833-B-1

Selanik Sancağı Mutasarrıfı sa‘âdetlü Sırrı Selim Paşa hazretlerinin kapı kethüdâsı hâcegân-ı Dîvân-ı Hümâyûn'dan Esad Efendi kullarının bir kıt‘a takrîri mefhûmunda Tekelioğlu müte‘allikātından Selanik'de ikāmete me’mûr olanlar ile bile gelip ile'l-ân mahall-i mezkûrda ikāmet üzere olan Emin Ağa'nın Ahmed'i denilen kimesne mukaddemâ kaffeten kendi irâdesiyle ol tarafda ikāmet etmiş olduğundan el-hâletü hâzihî Antalya cânibine azîmet ederim diyerek hareket üzere olduğunu beyân birle me’mûrlara dâhil midir ve savb-ı mezkûra azîmetinde mahzûr var mıdır müşârun-ileyh bâ-tahrîrât istifsâr etmiş idüğünü tahrîr eder. Sâdır olan fermân-ı âlîleri mûcebince bu tarafda olanlardan ve sâir erbâb-ı vukūfdan lede't-taharrî merkūm Ahmed Maktûl Tekelioğlu'nun kayını Emin Ağa'nın sulbî sahîh oğlu olduğu tahkīk olunduğu ve muhallefât derkenârına nazaran Tekelioğlu müte‘allikātından olup maâş ta‘yîniyle Selanik'de iskânlarına irâde-i seniyye ta‘alluk eden otuz nefer kesâna merkūm Ahmed dâhil olduğuna dâir kayd bulunmadığı ma‘lûm-ı devletleri buyuruldukda ol bâbda ne vechile emr u irâde-i aliyyeleri buyurulur ise emr u fermân devletlü sa‘âdetlü sultânım hazretlerinindir.