İ. DH. 1077/84472 #2A

İ. DH, 1077-84472-3

Bâb-ı Âlî
Dâire-i Sadâret
Âmedî-i Dîvân-ı Hümâyûn

Devletlü efendim hazretleri
Antalya muhâcirlerinden müteveffâ Hacı Ömer Bey'in kerîmesi Kâmile Hânım'ın vefâtına mebnî muhtâcîn maâşâtı miyânında bâ-kayd-ı hayât Selanik Sancağı emvâlinden muhassas olup mahlûl olan iki kalem şehrî yüz seksen dokuz guruş maâşın emsâline tevfîkan müteveffât-ı mûmâ-ileyhânın mahdûmu Mehmed Beyle kerîmesi Râbia Hânım'a münâsafeten tahsîsi husûsuna dâir Maliye Nezâret-i Celîlesi'nin tezkiresi leffen arz ve takdîm kılınmağla ol bâbda her ne vechile emr u fermân-ı hümâyûn-ı hazret-i pâdişâhî şeref-sünûh ve sudûr buyurulur ise mantûk-ı münîfi infâz edileceği beyânıyla tezkire-i senâverî terkīm kılındı, efendim.
Fî 12 Receb sene [1]305 – Fî 12 Mart sene [1]304.

Sadr-ı a‘zam
(imzâ)
Kamil

Ma‘rûz-ı çâker-i kemîneleridir ki
Resîde-i dest-i ta‘zîm olup melfûfuyla manzûr-ı âlî buyurulan işbu tezkire-i sâmiyye-i Sadâret-penâhîleri üzerine mûcebince irâde-i seniyye-i hazret-i hilâfet-penâhî şeref-sudûr buyurulmuş olmağla ol bâbda emr u fermân hazret-i veliyyü'l-emrindir.
Fî 13 Receb sene [1]305 – Fî 13 Mart sene [1]304.

Ser-kâtib-i hazret-i şehriyârî
Süreyya