C. DH. 348/17372 #1

CEVDET DAHİLİYE, 17372

Cenâb-ı vâcibü'l-vücûd
Şevketlü kudretlü mehâbetlü kerâmetlü azametlü pâdişâh-ı âlem-penâh efendimiz hazretlerinin mübârek vücûd-ı hümâyûnların cemî‘-i hatâ ve hatarlardan me’mûn ve masûn edip serîr-i saltanat-ı cihân-dârîlerinde ebed-makrûn ve sâye-i zıll-i merhamet-i mülûkânelerin kâffe-i enâm üzere sâyebân ve a‘dâ-yı bed-hahların hemîşe makhur ve münhezim ve cümlesi üzerlerine mansûr ve muzaffer buyursun âmîn bi-hürmeti seyyidi'l-enbiyâ ve'l-mürselîn arzuhâl-i kulları kātilen vefât eden Tekelioğlu İbrahim'in biraderi olup katl ve i‘dâmıyla cezâsını buldukda altmış nefer ta‘alluk ve ta‘allukātının mahrûse-i Selanik'de ikāmelerine irâde-i seniyye-i mülûkâneleri sünûhuna imtisâlen mahrûse-i mezkûrda varıp ikāme otuz nefer zükûr ve inâs fukarâlarına rahmen beherlerimize yevmiyye altmışar para maâş olarak evlâd-ı fâtihân mukāta‘ası mâlından Selanik Duhân Gümrüğü emini olanlardan almak üzere ta‘yîn ve ihsân-ı hümâyûn buyurulmuş ise de bu kulları müteveffâ-yı merkūmun biraderi ve otuz nefere dâhil kulları iken hakk-ı âcizânelerimizde bahr-i eltâf ve merhamet-i mülûkâneleri temevvücüylü bu kulları ve beş nefer müte‘allikātım kulları ve câriyelerinin Deraliyye'de ikāmelerimize ruhsat-ı şâhâne mebzûl ve mesrûren Deraliyye'ye vürûdumuz mukarrer ve du‘â-yı devâm-ı ömr u devlet-i şâhâneleri tekrârına muvâzabet üzere olalı bu kadar müddetden beri bir yerden medâr ve maâşlarımız olmayıp sâlifü'z-zikr beher esâmilerimize ta‘yîn buyurulan yevmiyye altmışar para sadaka-i seniyye-i mülûkânelerin kendi devr-i eyyâm-ı ma‘delet-i hüsrevânelerinde zarûretden vikāye oluruz ümidiyle terâküm eden yevmiyyelerimizin tahsîli için bir kıt‘a emr-i âlî dahi sudûr ve tesyîr olunmuş ise de envâ‘-ı kevniyye bahâne ve a‘zâr-ı vâhiyye ile imrâr-ı vakt ve ile'l-ân bir akçesine destres olamayıp mağdûr ve perîşân ve düyûn-ı kesîreye giriftâr olarak ahvâllerimiz diğergûn ve şâyeste-i zıll-ı merhamet-i hümâyûnları olduklarımız ma‘lûm-ı mülûkâneleri buyurulmak için arzuhâle cesâret kılınmışdır. Merâhim-i mülûkânelerinden mercû ve mutazarrı‘dır ki bu kullarının ve sagīr kardaşlarım İsmail ve Bekir ve Abdülfettah ve zevcem Hadice'nin yevmiyye-i mezkûrlarımız Âsitâne Duhân Gümrüğü'ne havâle olarak Selanik gümrükcüsünden taleb ve nakz şartıyla beher mâh Deraliyye'de gümrük-i mezkûrdan yevmiyye-i âcizânelerimizin i‘tâsına irâde-i kātı‘a-i mülûkâneleri ta‘alluk ve cümlelerimizi ihyâ ve mesrûr ve ilâ âhiri'l-ömr du‘â-yı devâm-ı ömr u devletleri tekrârına kıyâm buyurulmak bâbında emr u fermân-ı hümâyûn-ı inâyet-makrûn şevketlü kudretlü mehâbetlü kerâmetlü azametlü pâdişâh-ı âlem-penâh efendimiz hazretlerinindir.

Bende-i
Mir Yusuf Tekelioğlu kulları

İzzetlü defterdâr efendi
İşbu arzuhâle nazar ve kuyûd-ı lâzımesine mürâcaat ve muktezâsını ifâde eyleyesiz deyu buyuruldu.
Fî 7 Ra. sene [12]34.

Kuyûd-ı lâzımesi ve meal-i arzuhâle nazaran iktizâsı Başmuhâsebe'den

Berây-ı tertîb ve tahsîs şüde în kadar mâl-ı mukāta‘a ve cizye-i mezkûrîn berây-ı maâşât-ı müte‘allikāt-ı maktûl Tekelioğlu İbrahim nâm şakī ki pîş-ez-în mevkūfât bâ-irâde-i aliyye be-cânib-i Selanik nakl ve iskân şüde ve bâ-irâde-i şâhâne în-kadar-meblağ be-mûmâ-ileyhim maâş ta‘yîn şüde ve ber-în-vech tanzîm şüde be-kalem-i muhâsebe-i evvel ilmuhaber dâde fermûde el-vâki‘ der-sene 1230 ber-mûceb-i kāim-i hazret-i vezîr-i mükerrem Mehmed Vâhid Paşa mîr-i mîrân-ı livâ-i Teke ve Hamid ve derkenâr ve takrîr ve bâ-hatt-ı hümâyûn-ı şevket-makrûn ve bâ-telhîs ve fermân-ı âli fî 18 Ra. sene 1230 ve bâ-fermân-ı şerîf ilmuhaber dâde fî 17 Za. sene [1]230

Merkūmûndan Teke'ye iâdeleri kat‘iyyen câiz olmayıp Selanik'de iskân oluna gelen

Yekûn
Neferen 16

Merkūmûndan zevce ve evlâdı ve vâlideleri Selanik'de ikāmet etmek[de olup] kendileri dahi bâ-takrîr şimdilik ol tarafda olmaları îcâb edenler

Yekûn
Neferen 12

Merkūmûndan Teke'ye iâdeleri câiz olup yetîm olmaları takrîbiyle gelseler kimseleri olmadığından tevkīfi iktizâ edenlerden

Yekûn
Neferen 2

Cem‘‘an yekûn
Neferen 30

Berây-ı tertîb ve tahsîs şüde an-mâl-ı mukāta‘a-i mezbûrîn berây-ı maâş-ı müte‘allikāt-ı merkūme

Guruş
03000 Cizye-i Selanik sene 1231
10000 Mukāta‘a-i bedel-i muâfiyet-i evlâd-ı fâtihân sene 1231
02576,5 Mukāta‘a-i âdet-i ağnâm-ı Selanik sene-i minhû
0353,5 Mukāta‘a-i Kubaç-ı Siroz sene-i minhû
15930

Tekelioğlu maktûl İbrahim nâm şakīnin akrabâ ve ta‘allukātından kırk sekiz neferi Selanik'e nakl ve iskân kılınmak bâbında haklarında irâde-i aliyyem ta‘alluk etmekden nâşî merkūmûndan on sekiz nefer kendilerini idâreye muktedirdir.