C. DH. 348/17372 #2

CEVDET DAHİLİYE, 17372

ve otuz neferi fakīr ve yetîm ve mahâll-i âhere avdetleri câiz olmadığından sâlifü'z-zikr otuznefere yevmiyye altmışar para maâş ta‘yîni husûsuna irâde-i şâhâne taalluk edip ol bâbda sâdır olan hatt-ı hümâyûn-ı şevket-makrûn-ı şâhâne sâdır olan fermân-ı âlî mûcebince merkūmândan otuz neferin beherine yevmiyye altmışar paradan beher sene iktizâ eden on beş bin dokuz yüz otuz guruşun üç bin guruşu Selanik cizyesinden iki yüz otuz bir senesinden ve kusûr u sâir emvâlden tertîb ve tahsîs olunduğu bâ-takrîr rikâb-ı hümâyûn-ı mülûkâneye arz olundukda tertîb olunduğu üzere tanzîm olunmak bâbında hatt-ı hümâyûn-ı şevket-makrûn-ı şâhâne şeref-rîz-i sudûr olmağla mûcebince tanzîm olunmak bâbında sâdır olan fermân-ı âlî mûcebince muhallefâta kayd olunup cizye muhâsebesine ve sâir iktizâ eden mahallere ilmuhaberleri verilmek fermân buyurulmağın mûcebince kayd olunup emvâl-i mîriyyeyi … otuz bir senesinden tertîb ve merkūmânın beherine yevmiyye altmışar para maâş ta‘yîn kılındığını müş‘ir fî 17 Za. sene 1230 târihinde muhallefâtdan vürûd eden ilmuhaber kāimesi mukayyed olup bu sûretde merkūmların Dersaadet'e gelmelerine bir gûne ruhsat-ı seniyye var mıdır Dîvân-ı Hümâyûn ve Muhallefât'dan ve gümrük-i mezbûrun keyfiyeti Maden Kalemi'nden görülmek iktizâ eder fermân devletlü inâyetlü sultânım hazretlerinindir.
Fî 13 Ra. sene 1234

Dîvân-ı Hümâyûn ve Muhallefât ve Maden Kalemi'nden derkenâr

Selanik Sancağı Mutasarrıfı Vezîrim ( ) Paşa [edâmallâhu te‘âlâ] iclâlehûya ve Selanik kādîsına hüküm
Tekelioğlu maktûl İbrahim'in ahz ve i‘dâmından sonra ricâl ve nisvân ve kavim ve kabîlesinden iktizâ eden mâddeler suâl ve tahkīk olunup ba‘dehû cümlesinin Selanik'e irsâlleriyle ânda meks ve iskân olunmaları şeref-rîz-i sudûr eden emr-i şerîfim mûcebince maktûl-i merkūmun bir takım kavim ve kabîlesiyle üvey karındaşı Yusuf Bey ve vâlidesi ve sabî karındaşı Bekir Bey dahi sefîneye irkâben Selanik'e gönderilmiş ve mîr-i mûmâ-ileyh taraf-ı Devlet-i Aliyyeme itâat ve inkıyâd ile onlardan rû-gerdân olmuş olduğundan mîr-i mûmâ-ileyh dahi Selanik'de iskân etdirilmesi gayr-ı lâyık idüğü beyânıyla mîr-i mûmâ-ileyh ve vâlidesiyle bir nefer sagīr karındaşı Bekir Bey maktûl-i merkūmun ol tarafda olan kavim ve kabîlesinden tefrîk olunarak bu tarafda ikāmet eylemek üzere Dersaadetime celb olunmalarıyla müsâ‘ade-i şâhânem erzânî kılınması husûsu bi'l-fi‘il Deryâ Kapudanı olup merkūm İbrahim'in i‘dâmına me’mûr olan düstûr-ı vezîrim Hüsrev Mehmed Paşa [edâma'llâhu] iclâlehû tarafından mukaddemâ bâ-takrîr ifâde olunup müşârun-ileyhin inhâsı vechile müsâ‘ade-i şâhânem erzânî kılındığını mübeyyin ol bâbda şeref-yâfte-i sudûr olan hatt-ı hümâyûn-ı inâyet-makrûnum mantûku üzere sâdır olan emr-i şerîfim mûcebince merkūm Yusuf Bey ile vâlidesi Kâmile ve bir nefer sagīr karındaşı Bekir Bey Dersaadetime gelmişler ise de merkūm Yusuf Bey'in zevcesi Hadice ile üvey oğlu Abdülfettah Bey ol cânibde kalmış oldukları beyânıyla onların afv ve ıtlâkları bâbında emr-i şerîfim sudûrunu merkūm Yusuf Bey'in vâlidesi Kâmile Hâtun bu def‘a bâ-arzuhâl istid‘â etmekle şeref-yâfte-i sudûr olan hatt-ı hümâyûn-ı şevket-makrûn-ı şâhânem mûcebince merkūmun zevcesi Hadice ile üvey oğlu Abdülfettah'ın dahi afv ve ıtlâkları bâbında fî evâhiri Za. sene [12]31 târihinde Dîvân-ı Hümâyûn tarafından emr-i âlî verildiği mukayyeddir. Fermân devletlü sultânımındır.
Fî 17 Ra. sene [12]34.

Maktûl Tekelioğlu müte‘allikātından İsmail ve Bekir ve Yusuf nâm kimesnelerin Dîvân-ı Hümâyûn'a takdîm eyledikleri bir kıt‘a arzuhâlleri mefhûmunda Selanik cizyesi ve bedel-i muâfiyet-i evlâd-ı fâtihân ve mukāta‘ât-ı sâire mâllarından olmak üzere kendiler ile sâir Selanik'de mukīm müte‘allikātın beherine yevmiyye ta‘yîn olunan altmışar para maâşlarından kendileri Dersaadet'de bulunmaları takrîbiyle bin iki yüz otuz senesinden beri terâküm eden maâşlarının tahsîl ve taraflarına irsâli bâbında sen ki vezîr-i müşârun-ileyhsin sana hitâben bir kıt‘a emr-i şerîfim sudûrunu tahrîr ve istid‘â eyledikleri ecilden kuyûda mürâcaat olundukda maktûl-i merkūmun müte‘allikātından otuz nefer kesân sene-i merkūmeden i‘tibâren cizye ve mukāta‘âtı merkūme emvâlinden beherine yevmî altmışar paradan senevî bâ-hatt-ı hümâyûn-ı şevket-makrûn on beş bin dokuz yüz otuz guruş maâş ta‘yîn olunmuş ve sene-i merkūme Muharremi gurresinden otuz iki senesi Receb-i şerifin gāyetine değin ashâb-ı arzuhâl ile sâir beş nefer kesânın terâküm eden dört bin iki yüz on buçuk guruş maâşlarının bundan akdem bâ-arzuhâl istid‘â larına binâ’en tahsîli bâbında emr-i şerîf verilmiş olmağla bu sûretde zikr olunan maâşlarının bu âna kadar ahzına destres olamadıkları ecilden otuz bir senesi Muharremi gurresinden işbu otuz üç senesi Zilhiccesi gāyetine değin hesâb etdirdiği vechile cem‘an lâzım gelen dört bin yedi yüz yetmiş dokuz guruş maâşlarının bu tarafa gönderilmesi için tahsîli bâbında sana hitâben emr-i şerîfim ısdârı iktizâ eylediği Muhallefât'dan derkenâr ve bâ-takrîr lede'l-arz mûcebince emr-i şerîfim ısdârı husûsuna irâde-i aliyye ta‘alluk etmekle mûcebince amel ve harekete bezl-i cell-i himmet eylemen fermân olmağın fî 26 Za. sene 1233 târihiyle Selanik Sancağı Mutasarrıfı Vezîr Yusuf Paşa [edâma'llâhu te‘âlâ] iclâlehû ve Selanik Mollasına hitâben emr-i şerîf verildiği mukayyeddir. Fermân devletlü inâyetlü sultânım hazretlerinindir.
Fî 21 Ra. sene 1234.

Darbhâne-i Âmire tarafından nezâret ile ber-vech-i emânet idâre olunan İstanbul ve Arabistan ve Yenice-i Karasu ve Selanik ve tevâbi‘leri duhân gümrükleri mukāta‘âtı üç bin üç yüz elli kîseye deruhde ve iltizâm olunmağla ma‘a merbûtât mukāta‘a-i merkūmenin mâl-ı mîrîsi ve merbûtâtının fâizleri olan üç yük yetmiş bin altı yüz kırk beş buçuk guruş ve eshâm fâizi olan dokuz yük doksan sekiz bin kırk bir buçuk guruş (…) ve mahsûbât-ı sâire olan seksen dokuz bin dokuz yüz yetmiş iki buçuk guruş bedel iltizâm-ı mezkûrdan ifrâz olundukda iki yük on altı bin üç yüz kırk guruş fazla-i fâiz kalmak îcâb ederse gene fâiz-i mezkûrdan ber-vech-i eshâm mukaddemâ iki def‘ada tertîb ve fürûht olunmuş olan yüz bin guruş ile Maden Kalemi defterinin mîzânında gösterildiği üzere gümrük-i mezkûrun mâl-ı mukayyedinden ziyâde ocaklık ve vezâ’if tertîb olunarak ziyâde-i muhâsebe zuhûr eden yetmiş beş bin üç yüz iki buçuk guruş aşağı varıldıkda kırk bir bin otuz yedi buçuk guruş fâiz-i hümâyûn kalacağı ve gümrük-i mezkûr eshâmı mahlûlâtından sülüsü Darbhâne-i Âmire'ye zabt ve hayr-ı mâ-fât olmak üzere bu def‘a tanzîm olmağla müddet-i kalîle zarfında işbu fâiz-i hümâyûndan müretteb sâlifü'z-zikr yüz bin guruş ber-mûceb-i nizâm istîfâ olunarak hey’et-i asliyyesine rücû‘u me’mûl idüğü ve ba‘de'l-yevm açılan ocaklık ve münhal olan maâş ve mahlûl olan vezâ’if zikr olunan ziyâde-i muhâsebeye takas olunup âher mahalle ta‘yîn ve tevcîh olunmamak ve ziyâde-i mezkûr tekmîl olmadıkca müceddeden vazîfe ve maâş tevcîh buyurulmamak ve beher sene rü’yet-i muhâsebede mâl-ı mukayyedini tecâvüz eden her ne ise ceyb-i hümâyûn için cânib-i mîrîden istîfâ olunmak ve tezkiresi verilmek üzere tanzîmine müsâ‘ade-i aliyye şâyân buyurulur ise bi-mennihî te‘âlâ meblağ-ı mezkûru dahi istîfâ ile sene be-sene fâiz-i hümâyûnun istihsâlini mûcib olacağını hâlâ Darbhâne-i Âmire nâzırırı sa‘âdetlü atûfetlü efendi hazretleri bâ-takrîr inhâ etmeleriyle takrîrleri nefsü'l-emre mutâbık ve maslahata muvâfık olmağla mûcebince tanzîmi husûsunu bâ-takrîr lede'l-arz işbu takrîr mübârek rikâb-ı hüsrevâneye arz ve takdîm olundukda pesendîde-i hümâyûnum olmuşdur takrîr mûcebince tanzîmine mübadaret ve bu husûsa Darbhâne-i Âmire nâzırı nezâretinde hâlî olmayıp eshâmın vaktiyle verilmezine ve sermâye ve bakāyâların tahsîline dikkat eylemek mazmûnunda hatt-ı hümâyûn-ı şevket-makrûn-ı şâhâne şeref-rîz-i sudûr olmağla mûcebince iktizâ-yı nizâmına mübâderet olunmak bâbında sâdır olan fermân-ı âlî mûcebince Darbhâne nâzırı mûmâ-ileyh hazretlerinin dört bend takrîri ve mazmûn-ı hatt-ı hümâyûn Maden Kalemi'ne kayd ve gümrük-i mezkûr seneteyn olarak Mahmud Nedim Bey'in uhdesine ber-vech-i iltizâm ihâle ve kayd olunup şerâ’it-i mukarrere derciyle iktizâsına göre berât-ı şerîfi ve Darbhâne-i Âmire ve zimmet defterlerine ve sâir iktizâ eden mahallere ilmuhaberleri i‘tâsıyla tanzîmi lâzım gelmekle ber-vech-i muharrer Maden Kalemi'ne kayd ile berât-ı şerîf ve ilmuhaberleri i‘tâsı bâbında bâ-telhîs ve fermân-ı âlî sâdır olmağın mûcebince kayd olunup şerâ’it-i lâzımesi derciyle berâtı ve sâir iktizâ eden mahallere ilmuhaberleri verilmekle ba‘de'l-yevm açılan ocaklık ve münhal olan maâş ve mahlûl olan vezâ’if zikr olunan ziyâde-i muhâsebeye takas olunup âher mahalle ta‘yîn ve tevcîh olunmamak ve ziyâde-i mezkûr tekmîl olmadıkca müceddeden vazîfe ve maâş tevcîh buyurulmamak üzere bâ-irâde-i aliyye tanzîm olunduğunu mübeyyin fî 9 Ra. sene [1]227 târihinde Başmuhâsebe'ye ve Ru’ûs-ı Hümâyûn Kalemi'ne ve Anadolu Muhâsebesi'ne ve sâir iktizâ eden mahallere ilmuhaberleri verildiği mukayyeddir. Fermân devletlü inâyetlü sultânım hazretlerinindir.
Fî 21 Ra. sene 1234.

Tekrâr iktizâsı bi'l-mütâla‘a Başmuhâsebe'den

Bundan akdem katlen vefât eden Tekelioğlu İbrahim'in altmış nefer ta‘alluk ve terettübâtının mahrûse-i Selanik'de ikāmetlerine irâde-i seniyye ta‘alluk ederek otuz nefer zükûr ve inâs fukarâlarına rahmen beherine altmışar para maâş olarak evlâd-ı fâtihân mukāta‘ası mâlından ve Selanik duhân gümrüğü emini olanlardan almak ve ta‘yîn ve ihsân-ı hümâyûnum buyurulmuş olduğu beyânıyla müteveffâ-yı merkūmun biraderi sâhib-i arzuhâl-i merkūm ve beş nefer ta‘allukātların Deraliyye'de ikāmetlerine ruhsat-ı şâhâne buyurularak Deraliyye'ye vürûd eylediklerinden beri bir mahalden medâr-ı maâşları olmadığı ve sâlifü'z-zikr ta‘yîn buyurulan beher nefere yevmiyye altmışar para sadaka-i seniyye-i mülûkânenin terâküm eden mebaliğin tahsîli için bir kıt‘a emr-i âlî dahi sudûr etmiş ise de envâ‘an gûne bahâne ve a‘zâr-ı vâhiyye ile imrâr-ı vakt ile'l-ân bir akçesine destres olamadıklarından bahisle Âsitâne Duhân Gümrüğü'ne havâle olunarak Selanik gümrükcüsünden taleb ve nakz şartıyla beher mâh Deraliyye'de gümrük-i mezkûrdan i‘tâsı istid‘â olunduğu rikâb-ı hümâyûn-ı mülûkâneye ref‘ ve takdîm eylediği işbu arzuhâl mefhûmunda ve müteveffâ-yı merkūmun ta‘allukātlarından otuz nefer zükûr ve inâsa yevmiyye altmışar para cizye-i Selanik ve bedel-i muâfiyet-i evlâd-ı fâtihân ve sâir emvâllerden tahsîs olunmuş olduğu ve merkūmânın terâküm eden maâşlarının tahsîli için emr-i şerîf verilmiş verilmiş oldu ve bu makūle gümrük ve emvâl-i mîriyye-i sâireden müceddeden vazîfe tevcîh olunmuş bâ-hatt-ı hümâyûn-ı şevket-makrûn bi'l-mu‘âyene memnû‘âtdan idüğü derkenârlardan müstebân olmağla bu sûretde [sâhib-i] arzuhâllerin îcâb [eden] maâşları Dersaadet'de sarrâfı tarafından verilmek üzere tanzîm ve ashâb-ı arzuhâl taraflarına sûreti ve mahalline emri i‘tâsı veyahud mukaddem sâdır olan emr-i şerîf mûcebince mahallinden tahsîli için emri i‘tâsı re’y-i âlîye menûtdur. Fermân devletlü inâyetlü sultânım hazretlerinindir.
Fî 11 Ca. sene 1234

Sâhib-i arzuhâl-i merkūm ile sâir Dersaadet'de ikāmetlerine irâde buyurulan müte‘allikātının bir senelik maâşları hesâb ola

Vâcib an-gurre-i M. sene 1233 ilâ gāye-i Z. sene-i minhû ber-mûceb-i arzuhâl-i rikâb-ı hümâyûn ve derkenâr bâ-fermân-ı şerîf
Neferen 5
Fî yevm 300 para
Eyyâm 354, fî beher nefere 60 para
106200 para
2655 guruş

An-mâl-ı tertîb ve tahsîs şüde an-mâl-ı mukāta‘ât-ı mezkûrîn berây-ı maâş-ı ta‘allukāt-ı merkūmûn

Guruş
03000 Cizye-i Selanik
10000 Mukāta‘a-i bedel-i muâfiyet-i evlâd-ı fâtihân
02576,5 Mukāta‘a-i âdet-i ağnâm-ı Selanik
00354,5 Mukāta‘a-i Kubaç-ı Siroz
15930

Fermân buyurulduğu üzere Dersaadet'de olan beş nefer müte‘allikātının bir senelik maâşları hesâb olundukda bu mikdâr eder. Fermân devletlü inâyetlü sultânım hazretlerinindir.
Fî 16 C. sene 1234.

Takrîr

Selanik cizyesi kime deruhde olunmuşdur ve işbu Tekeli takımı için mâl-ı cizyeden ne mikdâr şey tertîb kılınmışdır Cizye Muhâsebesi'nden

Berây-ı maâş-ı müte‘allikāt-ı Tekelizâde an-mâl-ı cizye-i gebrân-ı kalem-i Selanik ta‘yîn şüde ber-mûceb-i ilmuhaber-i kalem-i Muhâsebe-i Evvel
Sene
3000 guruş

Ber-vech-i maâş merkūmlara cizye-i mezbûre mâlından bu mikdâr meblağ ta‘yîn olunmuş olup Selanik Kalemi cizyesi ber-mûceb-i şürût iki yüz otuz dört senesine mahsûben Vâlide Hanı sâkinlerinden Sarrâf Agob kefâletiyle hâlâ Selanik Sancağı Mutasarrıfı sa‘âdetlü Yusuf Paşa hazretlerine ihâle buyrulmuş idüğü ma‘lûm-ı devletleri buyuruldukda fermân devletlü inâyetlü sultânım hazretlerinindir.
Fî 18 C. sene 1234.