C. DH. 348/17372 #5

CEVDET DAHİLİYE

Mûcebince yazıla

Hâlâ Selanik Sancağı Mutasarrıfı Vezîrim Yusuf Paşa edâma'llâhu te‘âlâ iclâlehûya hüküm ki
Maktûl Tekelioğlu İbrahim'in üvey biraderi Yusuf Bey'in mübârek rikâb-ı kâm-yâb-ı mülûkâneme ref‘ ve takdîm eylediği bir kıt‘a arzuhâl mefhûmunda maktûl-i merkūmun akrabâ ve ta‘allukātından mahrûse-i Selanik'de ikāmetlerine irâde-i seniyyem ta‘alluk eden kırk sekiz neferden otuz neferin beherine Selanik cizyesi ve mukāta‘ât-ı sâire emvâlinden yevmiyye altmışar para maâş ta‘yîn olunmuş ve mîr-i merkūm ile beş nefer ta‘allukātının Dersaadet'de ikāmetlerine ruhsat-ı şâhânem erzân kılınmış olduğuna binâ’en Dersaadetime vürûd birle terâküm eden maâşlarının tahsîli için bundan akdem emr-i şerîfim ısdâr ve tesyâr olunmuş ise de ile'l-ân bir akçesine destres olamayıp ol tarafda olan akrabâsı ahz ve sarf eylediklerinden bahisle mir-i merkūm ile beş nefer ta‘allukātının mu‘ayyen olan maâşlarının i‘tâsı husûsunu tahrîr ve istirhâm eylediği ecilden kuyûda mürâcaat ve muktezâsı suâl olundukda maktûl-i merkūmun müte‘allikātından Selanik'de iskân olunan kırk sekiz neferin on sekiz neferi kendilerine idâreye muktedir ve otuz neferi fakīr ve yetîm olup mahall-i âhere avdetleri câiz olmadığından sâlifü'z-zikr otuz nefer zükûr ve inâs kesâna iki yüz otuz senesinden i‘tibâren yevmiyye altmışar para maâş ta‘yîn olunup beher sene iktizâ eden on beş bin dokuz yüz otuz guruş maâşlarının üç bin guruşu Selanik cizyesi mâlından ve mâ‘adâsı mukāta‘ât emvâlinden bâ-hatt-ı hümâyûn-ı şevket-makrûnum tertîb ve tahsîs kılınmış olduğu ve maktûl-i merkūmun Selanik'e iskânları irâde buyurulan bir takım kavim ve kabîlesiyle biraderi merkūm Yusuf Bey'in vâlidesi ve sabî karındaşı Bekir Bey Selanik'e gönderilmiş ve mîr-i mûmâ-ileyh taraf-ı Devlet-i Aliyyeme itâat ve inkıyâd ile onlardan rû-gerdân olmuş olduğundan mîr-i mûmâ-ileyh vâlidesiyle bir nefer sagīr karındaşı Bekir Bey maktûl-i merkūmun kavim ve kabîlesinden tefrîk olunarak Dersaadetime celb olunmalarını sâbıkā Kapudan-ı Deryâ vezîrim Hüsrev Paşa mukaddemâ bâ-takrîr lede'l-inhâ Dersaadetime vürûdlarına irâde-i seniyyem ta‘alluk etmiş ise de merkūm Yusuf Bey'in zevcesi Hadice nâm hâtun ile üvey oğlu Abdülfettah Bey ol cânibde kalmış olduklarından onların dahi afv ve ıtlâk olunmasını mûmâ-ileyh Yusuf Bey'in vâlidesi mûmâ-ileyhâ arzuhâl [ve] istid‘â ve şeref-yâfte-i sudûr olan hatt-ı hümâyûn-ı şevket-makrûn-ı şâhâne mûcebince mîr-i mûmâ-ileyhin zevcesi mûmâ-ileyhâ ile oğlu mîr-i merkūmun dahi afv ve ıtlâkları bâbında iki yüz otuz bir senesi evâhir-i Zilka‘desi'nde başka ve mûmâ-ileyh Yusuf Bey ve ta‘allukātından olan beş nefer ile İsmail ve Bekir ve Yusuf nâm kimesnelerin yevmiyye altmışar paradan iki yüz otuz bir senesi Muharremi gurresinden otuz üç senesi Zilhiccesi gāyetine dek lâzım gelen dört bin yedi yüz yetmiş dokuz guruş maâşlarının tahsîl ve Dersaadetime irsâli bâbında sene-i sâbıka evâhir-i Zilka‘desi'nde başka evâmir-i şerîfe verilmiş ve cizye-i mezkûre ber-mûceb-i şürût iki yüz otuz dört senesine mahsûben sen ki vezîr-i müşârun-ileyhsin senin uhdene ihâle kılınmış olduğu ve sâhib-i arzuhâl-i merkūm ile ta‘allukātı olan beş neferin iki yüz otuz üç senesi Muharremi gurresinden Zilhiccesi gāyetine dek yevmiyye altmışar paradan bir senelik maâşları iki bin altı yüz elli beş guruşa bâliğ olduğu kuyûddan nümâyân olmağla bu sûretde mûmâ-ileyh ile sâir beş nefer ta‘allukātının bir senelik mezkûru'l-mikdâr maâşları Dersaadetimde Vâlide Hanı'nda sâkin sarrâfın tarafından verilmek üzere tanzîm ve yedine sûret ve mahalline ifâde-i hâli mutazammın emri i‘tâsı menût-ı re’y-i âlîşânım idüğü Başmuhâsebe ve Dîvân ve Cizye kalemlerinden derkenâr ve bâ-takrîr lede'l-arz mûcebince tanzîmi husûsuna irâde-i aliyyem ta‘alluk eylediği ecilden ol vechile meblağ-ı mezbûrun sarrâf-ı mesfûr tarafından i‘tâsı için sûreti verilmekle sana dahi ifâde-i hâli mutazammın emr-i âlîşânım ısdâr ve ( ) ile irsâl olunmuşdur imdi vusûlünde bâlâda bast u beyân olunduğu üzere mûmâ-ileyh ile sâir beş nefer ta‘allukātının sene-i merkūma mahsûben bir senelik müstahık oldukları mezkûru'l-mikdâr maâşları bu tarafda sarrâfın mersûm tarafından i‘tâsı için sûreti verildiği ma‘lûmun oldukda mûcib ve muktezâsı üzere amel ve harekete bezl-i cell-i himmet eylemen bâbında fermân-ı âlîşânım sâdır olmuşdur.
Fî 25 B. sene 1234
Muhâsebe-i [Evve]l
Yazılmışdır.