C. DH. 348/17372 #3

CEVDET DAHİLİYE, 17372

İzzetlü defterdâr efendi
Şıkk-ı evveli üzere tanzîm eyleyesin deyu buyuruldu
Fî selhi C. sene [12]34

Maktûl Tekelioğlu İbrahim'in üvey biraderi Yusuf Bey kullarının mübârek rikâb-ı kâm-yâb-ı mülûkâneye ref‘ ve takdîm eylediği bir kıt‘a arzuhâli mefhûmunda maktûl-i merkūmun akrabâ ve ta‘allukātından mahrûse-i Selanik'de ikāmetlerine irâde-i seniyye ta‘alluk eden kırk sekiz neferden otuz neferin beherine Selanik cizyesi ve mukāta‘ât-ı sâire emvâlinden yevmiyye altmışar para maâş ta‘yîn olunmuş ve mîr-i merkūm ile beş nefer ta‘allukātının Dersaadet'de ikāmetlerine ruhsat-ı şâhâne erzân buyurulmuş olduğuna binâ’en Dersaadet'e vürûd birle terâküm eden maâşlarının tahsîli için bundan akdem emr-i şerîf ısdâr ve tesyâr olunmuş ise de ile'l-ân bir akçesine destres olamayıp oltarafda olan akrabâsı ahz ve sarf eylediklerinden bahisle mîr-i merkūm ile beş nefer ta‘allukātının mu‘ayyen olan maâşlarının İstanbul Duhân Gümrüğü mâlından havâlesi husûsuna müsâ‘ade-i seniyye erzân buyurulmasını tahrîr ve istirhâm etmekden nâşî sâdır olan fermân-ı âlîleri mûcebince kuyûda mürâcaat ve muktezâsı suâl olundukda maktûl-i merkūmun müte‘allikātından Selanik'de iskân olunan kırk sekiz neferin on sekiz neferi kendilerini idâreye muktedir ve otuz neferi fakīr ve yetîme ve mahâll-i âhere avdetleri câiz olmadığından sâlifü'z-zikr otuz nefer zükûr ve inâs kesâna iki yüz otuz senesinden i‘tibâren yevmiyye altmışar para maâş ta‘yîn olunup beher sene iktizâ eden on beş bin dokuz yüz otuz guruş maâşlarının üç bin guruşu Selanik cizyesi mâlından ve mâ‘adâsı mukāta‘ât emvâlinden bâ-hatt-ı hümâyûn-ı şevket-makrûn tertîb ve tahsîs kılınmış olduğu ve maktûl-i merkūmun Selanik'e iskânları irâde buyurulan bir takım kavim ve kabîlesiyle biraderi merkūm Yusuf Bey'in vâlidesi ve sabî karındaşı Bekir Bey Selanik'e gönderilmiş ve mîr-i mûmâ-ileyh taraf-ı Devlet-i Aliyye'ye itâat ve inkıyâd ile onlardan rû-gerdân olmuş olduğundan mîr-i mûmâ-ileyh vâlidesiyle bir nefer sagīr karındaşı Bekir Bey maktûl-i merkūmun kavim ve kabîlesinden tefrîk olunarak ve Dersaadet'e celb olunmalarını sâbıkā Kapudan-ı Deryâ sa‘âdetlü Hüsrev Paşa hazretleri mukaddemâ bâ-takrîr lede'l-inhâ Dersaadet'e vürûdlarına irâde-i seniyye ta‘alluk etmiş ise de merkūm Yusuf Bey'in zevcesi Hadice nâm hâtun ile üvey oğlu Abdülfettah Bey ol cânibde kalmış olduklarına binâ’en onların dahi afv ve ıtlâk olunmasını mûmâ-ileyh Yusuf Bey'in vâlidesi mûmâ-ileyhâ bâ-arzuhâl istid‘â ve şeref-yâfte-i sudûr olan hatt-ı hümâyûn-ı şevket-makrûn-ı şâhâne mûcebince mîr-i mûmâ-ileyhin zevcesi mûmâ-ileyhâ ile oğlu mîr-i merkūmun dahi afv ve ıtlâkları bâbında iki yüz otuz bir senesi evâhir-i Zilka‘desi'nde Dîvân-ı Hümâyûn tarafından başka ve mûmâ-ileyh Yusuf Bey ve ta‘allukātından olan beş nefer ile İsmail ve Bekir ve Yusuf nâm kimesnelerin yevmiyye altmışar paradan iki yüz otuz bir senesi Muharremi gurresinden otuz üç senesi Zilhiccesi gāyetine dek lâzım gelen dört bin yedi yüz yetmiş dokuz guruş maâşlarının tahsîl ve Dersaadet'e irsâli bâbında sene-i sâbıka evâhir-i Zilka‘desi'nde Selanik Sancağı mutasarrıfı hazretlerine hitâben Muhallefât tarafından başka evâmir-i şerîfe verilmiş ve cizye-i mezkûre ber-mûceb-i şürût iki yüz otuz dört senesine mahsûben Vâlide Hânı sâkinlerinden Sarrâf Agob kefâletiyle livâ-i mezkûr mutasarrıfı sa‘âdetlü Yusuf Paşa hazretlerine ihâle kılınmış olduğu ve sâhib-i arzuhâl-i merkūm ile ta‘allukātı olan beş neferin iki yüz otuz üç senesi Muharremi gurresinden Zilhiccesi gāyetine dek yevmiyye altmışar paradan bir senelik maâşları iki bin altı yüz elli beş guruşa bâliğ olup ancak bu makūle gümrük ve emvâl-i mîriyye-i sâireden müceddeden vazîfe tevcîh olunmak bâ-hatt-ı hümâyûn-ı şevket-makrûn memnû‘âtdan idüğü derkenârlardan nümâyân olmağla bu sûretde mûmâ-ileyh ile sâir beş nefer ta‘allukātının bir senelik mezkûru'l-mikdâr maâşları Selanik Sancağı mutasarrıfı müşârun-ileyhin Dersaadet'de sarrâfı tarafından verilmek üzere tanzîm ve yedine sûret ve mahalline ifâde-i hâli mutazammın emr-i şerîf i‘tâsı veyahud mukaddem sâdır olan emr-i şerîf mûcebince mahallinden tahsîli için emr-i şerîf ısdârı re’y-i âlîlerine menût mevâddan idüğü Başmuhâsebe ve Cizye Muhâsebesi ve Maden ve Muhallefât ve Dîvân-ı Hümâyûn kalemlerinden derkenâr olunmuşdur. Ma‘lûm-ı devletleri buyuruldukda şıkkeynden kangisi tercîh ve her ne vechile emr u irâde-i seniyyeleri buyurulur ise emr u fermân devletlü sa‘âdetlü sultânım hazretlerinindir.

Telhîs